धरणगाव (प्रतिनिधी) येथील दिंडोरी प्रणित स्वामी समर्थ सेवा केंद्र येथे परमपूज्य गुरु माऊली आण्णासाहेब मोरे यांच्या आशीर्वादाने व मार्गदर्शनाने उद्या दि. सोमवार रोजी सकाळी भूपाळी आरती नंतर सकाळी ८:३० वाजता गुरुपौर्णिमेनिमित्त गुरुपुजनास सुरुवात होईल. संध्याकाळी ६ वाजेपर्यंत असेल.
श्री स्वामी समर्थ महाराजांच्या मूर्तीवर षोडशोपचारअभिषेक व पूजा करण्यात येईल, कलियुगाचे चालक मालक व पालक भगवान श्री स्वामी समर्थ महाराज आहेत सद्गुरू परमगुरु आणि गुरुतत्त्व तेच आहेत गुरुतत्व संपूर्ण ब्रह्मडाला व्यापुन दशांगुले उरले आहेत.
केंद्रात कार्यरत असलेल्या १८ विभागाअंतर्गत कार्य सुरू आहेत. त्याची मांडणी स्टॉल त्याचे प्रत्यक्ष मांडणी करण्यात येणार आहे व त्याची संपूर्ण माहिती सेवेकरी देतील. त्यात प्रामुख्याने देव, देव्हारा, गर्भसंस्कार, शिशु संस्कार, बाल संस्कार, युवा प्रबोधन, युवा संस्कार, कृषी शास्त्र, आरोग्य, आयुर्वेद, पर्यावरण, प्रकृती, वास्तुशास्त्र, स्वयंरोजगार, भारतीय संस्कृती, माहिती तंत्रज्ञान विभाग तसेच हॉस्पिटलचे जनकल्याण योजनेचे फॉर्म भरण्यात येतील व श्री स्वामी समर्थ सेवा मासिक फॉर्म भरणे इत्यादी विषयांवर सेवेकऱ्यांमार्फत मार्गदर्शन करण्यात येईल.
या कार्यक्रमासाठी सुमारे ६००० पेक्षा अधिक भाविक सेवेकरी येण्याच्या अंदाज आहे. या गुरु पौर्णिमा उत्सवासाठी जास्तीत जास्त भाविकांनी श्री गुरु पौर्णिमेनिमित्त गुरुपूजनात व विविध उपक्रम व सेवेत सहभागी व्हावे, असे आवाहन दिंडोरी प्रणित स्वामी समर्थ सेवा केंद्र धरणगाव तालुक्यातील संपुर्ण सेवेकरी परिवाराच्या वतीने करण्यात आले आहे.
