जळगाव (प्रतिनिधी) जुन्या भांडणाच्या कारणावरून एका तरूणाला शिवीगाळ करत मारहाण केल्याची घटना जळगाव शहरातील राजमालती नगरात शनिवारी रात्री ८.३० वाजता घडली आहे. याबाबत शहर पोलीस ठाण्यात दोन जणांविरोधात अदखलपात्र गुन्हा दाखल करण्यात आला आहे.
शहरातील दूध फेडरेशनच्या बाजूला असलेल्या रामालती नगरात फैजान राजू पटेल (वय २४) हा तरुण वास्तव्यास आहे. त्याच परिसरातील सिद्धार्थ माणिक वानखेडे व त्याच्यासोबत असलेल्या एका जणासोबत यापुर्वी त्यांच्यात वाद होवून एकमेकांविरुद्ध गुन्हे दाखल आहेत. याच भांडणाच्या कारणावरुन दि. २४ रोजी रात्रीच्या सुमारास फैजान पटेल हा दुचाकीने जात असतांना थांबला होता. दरम्यान, दारुच्या नशेत असलेल्या दोघांनी फैजानच्या हातातील मोबाईल जमिनीवर आपटून नुकसान केले. तसेच त्याला जीवंत सोडणार नाही अशी धमकी दिली. तसेच सिद्धार्थ याने फैजानच्या कानशिलात लगावून त्याला मारहाण केली. दरम्यान, फैजान पटेल हा तात्काळ शहर पोलीस ठाण्यात येवून त्याने तक्रार दिली. त्याच्या तक्रारीवरुन दोघांविरुद्ध अदखलपात्र गुन्ह्याची नोंद करण्यात आली आहे. पुढील तपास सफौ वाहेद तडवी हे करीत आहे.
