जळगाव (प्रतिनिधी) येथील ग. स. सोसायटी संचालक मंडळाला बरखास्त करण्यात आल्यानंतर आज या संस्थेचा कारभार प्राधिकृत अधिकाऱ्यांच्या मंडळाने स्वीकारला आहे. सहकार विभागाच्या प्राधिकृत मंडळामध्ये सहाय्यक निबंधक विजय गवळी, सहकार अधिकारी भाऊसाहेब महाले, लेखापरीक्षक प्रशांत विरकर यांचा समावेश आहे. प्राधिकृत अधिकारी मंडळातर्फ आजपासूनच ग.स.सोसायटीचा कारभार पाहण्यास सुरवात केली आहे.
जळगाव जिल्हा सरकारी नोकरांची पतपेढी (ग.स.सोसायटी)चे संचालक मंडळ बरखास्त करण्यात आले आहे. सोसायटीवर आता सहकार विभागाचे प्राधिकृत अधिकारी मंडळ (प्रशासक) नेमले असून आज त्यांनी पदभार स्वीकारला असल्याची माहिती जिल्हा उपनिबंधक संतोष बिडवाई यांनी दिली. गेल्या पाच महिन्यांपूर्वी संचालक मंडळाची मुदत संपलेल्या ग.स.सोसायटीतील सत्ताधारी, विरोधातील १४ संचालकांनी नुकतेच राजीनाम दिले. यामुळे ग.स.ची निवडणूक शासनाच्या आदेशानुसार काही महिन्यात घेतली जाणार आहे. ग.स. सोसायटीतील सत्ताधारी लोकसहकार गटाच्या पाच संचालकांनी विरोधी सहकार गटाला साथ देत अध्यक्ष मनोज पाटील यांच्याविरुद्ध बंड केले. दोन्ही गटाच्या १४ संचालकांनी २८ जानेवारीला राजीनामा दिला होता. सोसायटीच्या २१ पैकी १४ संचालकांनी राजीनामा दिल्यामुळे अध्यक्ष अल्पमतात आले होते. त्यामुळे संचालक मंडळ बरखास्तीची मागणी होती. ग.स.सोसायटीच्या १४ संचालकांनी दिलेल्या राजीनाम्याबाबत जिल्हा उपनिबंधकांकडून पडताळणी करण्यात आली. संबंधित संचालकांनी राजीनामे दिले असल्याचे समोर आल्याने ग.स.चे संचालक मंडळ बरखास्त झाले.
