जळगाव (प्रतिनिधी) आजारी असलेल्या नातेवाईकांना पाहण्यासाठी आलेल्या महिलेला घरी जाण्यासाठी निघाल्या. यावेळी महिलेच्या पर्समधून सोन्याचे दागिने व रोकड, असा एकूण ६६ हजार ३०० रुपयांचा ऐवज लांबवल्याची घटना शुक्रवारी दुपारी घडली. याप्रकरणी शहर पोलिस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
सुलोचना काशिनाथ चौधरी (वय-६६) या शुक्रवार दि. ५ रोजी आजारी असलेल्या नातेवाईकांना पाहण्यासाठी मोहन टॉकीज परिसरात आल्या होत्या. त्यांना पाहून झाल्यानंतर त्या रिक्षाने टॉवर चौकात आल्या. तेथून भादली येथे जाण्यासाठी त्या शिवाजीनगर उड्डाणपुलाकडे गेल्या. काही वेळानंतर भादली जाणारी बस आल्यानंतर त्या बसमध्ये चढल्या. तिकीट काढण्यासाठी त्यांनी त्यांच्याजवळील पिशवीत ठेवलेल्या पर्स शोधत असतांना त्यांना मिळून आली नाही. त्यांनी संपुर्ण पिशवी शोधल्यानंतर देखील त्यांना पर्स मिळून न आल्याने त्यांना पर्स चोरी झाल्याची खात्री झाली. त्या पर्समध्ये सुलोचना चौधरी यांनी १३ ग्रॅम वजनाची मंगळसूत्र व १ हजार ६०० रुपयांची रोकड चोरट्यांनी चोरुन नेली.
चोरीची खात्री झाल्यानंतर दिली पोलिसात तक्रार महिलेच्या शेजारी बसलेल्या एका व्यक्तीने सुलोचना चौधरी यांचे भादली पर्यंतचे तिकीट काढून दिले. त्यानंतर त्यांनी घटनेची माहिती कुटुंबियांना दिली. दरम्यान, चौधरी यांचा भाऊ त्यांना घेवून टॉवर चौकात आले. त्यांनी परिसरात पर्स शोधण्याचा प्रयत्न केला मात्र त्यांना मिळून आली नाही. अखेर त्यांनी शहर पोलीस ठाण्यात जाऊन तक्रार दिली. त्यानुसार अज्ञात चोरट्यांविरोधात गुन्हा दाखल करण्यात आला आहे. पुढील तपास पोलीस नाईक योगेश पाटील हे करीत आहे.
