मुंबई (वृत्तसंस्था) माजी मंत्री एकनाथराव खडसे आज सकाळी ११.३० वाजता ईडीच्या कार्यालयात हजर झाले होते. आता खडसे ईडीच्या कार्यालयातून बाहेर पडत आहेत. तब्बल ९ तास त्यांची चौकशी करण्यात आली आहे. दरम्यान, बाहेर पडल्यानंतर खडसेंनी कोणतीही प्रतिक्रिया देण्यास नकार दिला आहे.
माजी मंत्री तथा राष्ट्रवादी कॉंग्रेसचे ज्येष्ठ नेते एकनाथराव खडसे यांचे जावई गिरीश चौधरी यांना काल सकाळी सक्तवसुली संचलनालय अर्थात ईडीने अटक केली होत. त्यानंतर दुपारी खडसे यांना ईडीने चौकशीला हजर राहण्यासाठी नोटीस बजावली होती. खडसे यांना आज सकाळी अकरा वाजता ईडीच्या मुंबई येथील कार्यालयात चौकशीसाठी हजर राहण्याचे कळविण्यात आले होते. खडसे ईडीच्या कार्यालयात जाण्याआधी राष्ट्रवादी कॉंग्रेसच्या प्रदेश कार्यालयात पत्रकार परिषद घेणार असल्याचे जाहीर करण्यात आले होते. यानंतर मात्र, आज सकाळी राष्ट्रवादीने खडसे यांची प्रकृती बिघडल्यामुळे आजची पत्रकार परिषद रद्द करण्यात येत असल्याची माहिती ट्विटरच्या माध्यमातून दिली होती. पत्रकार परिषद रद्द झाल्यामुळे खडसे ईडीच्या कार्यालयात जाणार नाहीत, अशी माहिती समोर येत होती. परंतु, आज सकाळी ११.३० वाजता खडसे ईडीच्या कार्यालयात हजर झाले होते.
