धरणगाव (प्रतिनिधी) तालुक्यातील चावलखेडा येथे राहणाऱ्या ६४ वर्षीय महिलेच्या डोक्यावर प्रहार करून गळा दाबण्याचा प्रयत्न केल्याची घटना उघडकीस आली आहे. एवढेच नाहीतर सोन्याच्या दागिन्यांसह रोख रक्कम घेऊन एकाने पळ काढल्या प्रकरणी धरणगाव पोलीस स्थानकात दीपक प्रल्हाद पाटील यांच्याविरुद्ध गुन्हा दाखल करण्यात आला आहे.
यासंदर्भात मिठाई नारायण पाटील (वय ६४ रा. चावलखेडा ता. धरणगाव) यांनी दिलेल्या फिर्यादीनुसार, दि. २१ जून २०२२ रोजी दीपक प्रल्हाद पाटील (रा. चावलखेडा ता. धरणगाव) याने विठाबाई पाटील यांच्या डोक्यावर प्रहार करून गळा दाबण्याचा प्रयत्न केला. त्यावेळी मीठाबाई यांच्या शेजारी राहत असलेली संगीता मुकुंदा वाणी ही ओरड करीत असताना तिला सुध्दा मारले. तसेच दोघींच्या अंगावरील ५ तोळ्याच्या बांगड्या, ३ तोळ्याची पोत, २ तोळ्याच्या साखळ्या ८ ग्रॅम चे कानातले कापसे, ५ ग्रॅम चे दोन अंगठ्या आणि घरातील १ लाख रुपये, अशी रोख रक्कम लुटून घेवून गेला. याप्रकरणी धरणगाव पोलीस स्थानकात दीपक प्रल्हाद पाटील यांच्याविरुद्ध गुन्हा दाखल करण्यात आला असून पुढील तपास पोहेकॉ राजेंद्र कोळी हे करीत आहेत.
