जळगाव (प्रतिनिधी) – विद्युत सुरक्षेसाठी शालेय व महाविद्यालयीन विद्यार्थ्यांनी दैनंदिन जीवनात विद्युत सुरक्षेचे नियम काटेकोरपणे पाळावेत आणि सुरक्षादूत म्हणून विद्युत सुरक्षेचा सर्वत्र जागर करावा. तसेच पर्यावरणाचा समतोलासाठी व भविष्य सुरक्षित करण्यासाठी हरित ऊर्जेचा अंगीकार करा, असे आवाहन महावितरणचे संचालक (मानव संसाधन) श्री. राजेंद्र पवार यांनी दिला.
येथील जी. एच. रायसोनी कॉलेज ऑफ इंजिनिअरिंग अॅण्ड मॅनेजमेंट येथे बुधवारी (दि. २३) ‘ऊर्जा प्रबोधन’ कार्यक्रमात मार्गदर्शक म्हणून ते बोलत होते. एरव्ही प्रशासकीय कामांमध्ये व्यस्त असणाऱ्या संचालक श्री. पवार यांनी एका शिक्षकाची भूमिका साकारत वर्गात जाऊन विद्यार्थ्यांशी थेट संवाद साधला आणि वीजसुरक्षेसह हरित ऊर्जेचे महत्त्व सोप्या भाषेत पटवून दिले.
‘अभियंता दिना’चे औचित्य साधून आणि गणेशोत्सवाच्या कालावधीत महावितरणकडून राज्यभरात विशेष ‘ऊर्जा प्रबोधन मोहीम’ राबवली जात आहे. या पंधरवड्याच्या मोहिमेअंतर्गत महावितरणचे वरिष्ठ अधिकारी व अभियंते सामाजिक बांधिलकी जपत शाळा आणि महाविद्यालयांमध्ये जाऊन विद्यार्थ्यांचे प्रबोधन करत आहेत. या अभियानात स्वतः श्री. पवार यांनी जळगावात प्रत्यक्ष सहभाग नोंदवला.
विद्यार्थ्यांशी संवाद साधताना संचालक श्री. पवार म्हणाले, सध्याच्या आधुनिक युगात विजेचा वापर वाढला आहे. परंतु त्यासोबतच निष्काळजीपणामुळे होणाऱ्या अपघातांचे प्रमाणही चिंतेचा विषय ठरत आहे. इतर गोष्टींचे नुकसान भरून काढता येते पण एकदा गेलेला मानवी जीव पुन्हा परत आणता येत नाही. त्यामुळे प्रत्येकाने वीज वापरताना सुरक्षेचे नियम पाळले पाहिजेत. सतर्क राहिले पाहिजे. विद्यार्थी हे समाज परिवर्तनाचे आणि जनजागृतीचे प्रभावी माध्यम आहेत. विद्यार्थ्यांनी विद्युत सुरक्षेचे नियम आत्मसात करावे आणि सुरक्षादूत म्हणून आपल्या कुटुंबात, नातेवाईकांत आणि मित्रपरिवारात त्याचे महत्त्व पटवून द्यावे असे आवाहन संचालक श्री. पवार यांनी केले.
संचालक श्री. पवार यांनी सांगितले की, औष्णिक प्रकल्पांमध्ये कोळशापासून वीजनिर्मिती करताना मोठ्या प्रमाणावर कार्बन उत्सर्जन होते. परिणामी पर्यावरणाची अपरिमित हानी होते. हे कार्बन उत्सर्जन कमी करण्याचे जागतिक व राष्ट्रीय उद्दिष्ट साध्य करण्यासाठी महावितरण कटिबद्ध आहे. केद्र व राज्य शासन आणि महावितरणकडून राबवण्यात येणाऱ्या मुख्यमंत्री सौर कृषी वाहिनी योजना २.०, प्रधानमंत्री सूर्यघर मोफत वीज योजना, स्वयंपूर्ण महाराष्ट्र आवासीय रुफटॉप सोलर योजना आणि मागेल त्याला सौर कृषिपंप योजना यासारख्या विविध सौर ऊर्जा योजनांचा जास्तीत जास्त नागरिकांनी लाभ घ्यावा, यासाठी विद्यार्थ्यांनी पुढाकार घेऊन समाजात जनजागृती करावी असे आवाहन त्यांनी केले.
यावेळी जळगाव परिमंडलाचे मुख्य अभियंता श्री. आय. ए. मुलाणी, रायसोनी कॉलेजच्या संचालिका डॉ. प्रीती अग्रवाल, अधिष्ठाता डॉ. संजय शेखावत आणि विद्युत अभियांत्रिकी विभागप्रमुख डॉ. बिपासा पात्रा, अधीक्षक अभियंता मदन सांगळे, कार्यकारी अभियंता दत्तात्रय साळी यांची प्रमुख उपस्थिती होती.
