कोलकाता (वृत्तसंस्था) नुकत्याच पार पडलेल्या पश्चिम बंगाल विधानसभा निवडणुकी दरम्यान केलेल्या वादग्रस्त भाषणामुळे अभिनेते आणि भाजपचे नेते मिथुन चक्रवर्ती यांच्या अडचणींत वाढ झालीय. या प्रकरणात कोलकाता पोलिसांनी मिथुन चक्रवर्ती यांची चौकशी सुरू केलीय.
कोरोना संसर्गकाळात पोलिसांनी मिथुन चक्रवर्ती यांनी ‘व्हर्च्युअल’ पद्धतीनं चौकशी केलीय. पश्चिम बंगाल विधानसभा निवडणुकीच्या दरम्यान, मिथुन यांच्यावर प्रक्षोभक भाषण केल्याचे आरोप लावत मानिकतल्ला पोलीस स्थानकात त्यांच्याविरोधात तक्रार दाखल करण्यात आली होती. ज्यामध्ये चक्रवर्ती यांनी ७ मार्च रोजी भाजपमध्ये प्रवेश केल्यानंतर आयोजित करण्यात आलेल्या प्रचारसभेत ‘’मारबो एकहने लाश पोरबे शोशाने’ (तुमचा खात्मा केल्यास मृतदेह स्मशानात जातील) आणि ‘एक छोबोले चाबी’ (सर्पदंशानंच तुम्ही छायाचित्रात कैद व्हाल) अशी वक्तव्य केली, ज्यामुळंच राज्यात निवडणुकांनंतर हिंसा उसळली असं म्हटलं गेलं.
न्यायालयाकडून चक्रवर्ती यांना चौकशीत सहकार्य करण्याचे आदेश
निवडणुकांचे नियकाल जाहीर झाल्यानंतर मिथुन चक्रवर्ती यांनी आपल्यावर दाखल करण्यात आलेल्या या आरोपांच्या विरोधात कोलकाता उच्च न्यायालयात याचिका दाखल केली होती. ज्यामध्ये एफआयआर रद्द करण्याची मागणी करण्यात आली होती. पुढे उच्च न्यायालयानं चक्रवर्ती यांना त्यांचा ई-मेल राज्याकडे सुपूर्द करण्याचा आदेश दिला होता. जेणेकरुन सदर प्रकरणीच्या चौकशीसाठी ते व्हर्च्युइली सहभागी होऊ शकतील. दरम्यान, आपली बाजू मांडताना एफआयआर रद्द करण्याची मागणी करत आपण फक्त चित्रपटातील संवादच म्हटले होते अशी सारवासारव केल्याचं कळतय.
मिथुन चक्रवर्ती यांनी मार्च महिन्यात कोलकात्यात भारतीय जनता पक्षात प्रवेश केला होता. यानंतर त्यांनी भाजपच्या सभांत मुख्यमंत्री ममता बॅनर्जी आणि तृणमूल काँग्रेसविरोधात अनेक वादग्रस्त विधानं केली होती.
