चाळीसगाव (प्रतिनिधी) शहरात स्वतंत्र उपप्रादेशिक परिवहन कार्यालय सुरू करावे, अशी मागणी आमदार मंगेशदादा चव्हाण यांनी शासन दरबारी केली होती. या मागणीला नुकतीच मंजुरी मिळाली होती. तर आज सध्या असलेला ‘एम. एच. १९’ हा क्रमांक बदलून चाळीसगाव येथे उप प्रादेशिक परिवहन अधिकारी दर्जाचे MH 52 या नोंदणी क्रमांकासह नवीन कार्यालय सुरु करण्यास शासन मान्यता देण्यात आली आहे. दरम्यान, या कार्यालयामुळे जळगावला कराव्या लागणाऱ्या फेऱ्या वाचणार असल्याने चाळीसगाव तालुक्यासह परिसरातील नागरिकांनी आमदार चव्हाण यांना धन्यवाद दिले आहेत.
आमदार मंगेशदादा चव्हाण यांनी निवेदनाद्वारे मुख्यमंत्र्यांचे वेधले होते लक्ष !
चाळीसगाव मतदारसंघ हा जळगाव जिल्ह्यातील तिसऱ्या क्रमांकाचा मोठा तालुका असून, तो भडगावसह पाचोरा व पारोळा तालुक्यांच्या अगदी जवळ आहे. तसेच चाळीसगाव तालुका हा छत्रपती संभाजीनगर, नाशिक आणि धुळे जिल्ह्यांच्या सीमेवर वसलेला आहे. अलिकडे चाळीसगाव शहराचा झपाट्याने विकास होत असून, अनेक नवीन वाहने दरवर्षी नोंदणीकृत होत आहेत. वाहन चालविण्याचा परवाना काढणाऱ्यांची संख्या देखील खूप मोठी आहे. चाळीसगाव शहर व लगतच्या तालुक्यांमध्ये अनेकवेळा वाहन नोंदणीसाठ व वाहन चालविण्याचा परवाना काढण्यासाठी कॅम्प घेतले जातात. परंतु, त्यामुळे शासनावर मोठा आर्थिक भार पडतो. नागरिकांची मोठी गैरसोय देखील होते. ही स्थिती लक्षात घेता चाळीसगाव येथे उप प्रादेशिक परिवहन कार्यालय सुरु करण्याची मागणी अनेक वर्षांपासून केली जात होती. याकडे प्रामुख्याने आमदार मंगेशदादा चव्हाण यांनी निवेदनाद्वारे मुख्यमंत्र्यांचे लक्ष वेधले होते. तसेच चाळीसगाव येथे स्वतंत्र उप प्रादेशिक परिवहन कार्यालय सुरु करण्यासाठी संबंधित यंत्रणेला आदेशित करण्याची मागणी केली होती. त्यानुसार या मागणीला नुकतीच मंजुरी मिळाली होती. तर आज सध्या असलेला ‘एम. एच. १९’ हा क्रमांक बदलून चाळीसगाव येथे उप प्रादेशिक परिवहन अधिकारी दर्जाचे MH 52 या नोंदणी क्रमांकासह नवीन कार्यालय सुरु करण्यास शासन मान्यता दिली आली आहे. याबाबतचा अध्यादेश देखील निघाला आहे.
नागरिकांनी मानले आमदार चव्हाण यांचे धन्यवाद !
जळगाव येथील उप प्रादेशिक परिवहन कार्यालयाच्या दर्जात वाढ करून त्याचे आता प्रादेशिक परिवहन कार्यालयात रूपांतर करण्यात आले आहे. मात्र, संपूर्ण जिल्ह्याचा भार एकाच कार्यालयावर असल्याने नागरिकांना त्यामुळे मोठी गैरसोय सहन करावी लागते. विशेषतः चाळीसगाव शहर व परिसरातील नागरिकांना वाहन नोंदणीसह वाहन चालविण्याचा परवाना काढण्यासाठी सुमारे 200 किलोमीटर फेरा पडतो. त्यामुळे चाळीसगावला उप प्रादेशिक परिवहन कार्यालय सुरु होणार असल्यामुळे मोठी सोय होणार आहे. या कार्यालयामुळे जळगावला कराव्या लागणाऱ्या फेऱ्या वाचणार असल्याने चाळीसगाव तालुक्यासह परिसरातील नागरिकांनी आमदार चव्हाण यांना धन्यवाद दिले आहेत. दरम्यान, उपप्रादेशिक परिवहन कार्यालयात पाचोरा आणि भडगाव तालुका देखील जोडला जाणार असल्याचे कळते.
