मुंबई (प्रतिनिधी) मुंबई महापालिका निवडणुका (BMC Election)होईपर्यंत पंतप्रधान नरेंद्र मोदी (Narendra Modi)यांचा दिल्लीऐवजी मुंबईत राहू शकतो, अशी खोचक टीका ठाकरे गटाचे खासदार संजय राऊत (Sanjay Raut) यांनी केली आहे. ते माध्यमांशी संवाद साधत होते.
पंतप्रधान नरेंद्र मोदी आज मुंबईत येत आहेत. आज त्यांच्या हस्ते वंदे भारत ट्रेनला हिरवा कंदील दाखवला जाणार आहे. गेल्या 21 दिवसातील मोदी यांचा हा दुसरा मुंबई दौरा आहे. जोपर्यंत मुंबई महापालिकेच्या निवडणुका होत नाही. मुंबई महापालिकेची तारीख निश्चित होत नाही, तोपर्यंत पंतप्रधान नरेंद्र मोदींचा मुक्काम दिल्लीतून मुंबईतही राहू शकतो. ते मुंबईत घर घेऊ शकतात किंवा राजभवनात मुक्काम करू शकतात. कारण महापालिका जिंकण्यासाठी या मुंबई महाराष्ट्रातील भाजप आणि मिंधे गटाचे लोक समर्थ नाहीत.
मोदी आले आणि अख्खा देश लावला तरी महापालिका शिवसेना जिंकेल याची खात्री असल्याने मोदींचा पत्ता सारखा टाकला जातोय, अशी टीका संजय राऊत यांनी केली. तसेच अदानींच्या मुद्द्यावर मोदी गप्प का आहेत? अशी विचारणा संजय राऊत यांनी केली आहे. मला मोदींवर टीका करायची नाही. दिल्लीत संसद सुरू असताना. महत्त्वाचे विषय असताना, अदानीच्या मुद्द्यावरून विरोधकांनी घेरलेलं असताना मोदी मुंबईत येत आहेत. वंदे भारत ट्रेन हे निमित्त, असल्याचेही राऊत यांनी म्हटले आहे.
