मुंबई (वृत्तसंस्था) नाथाभाऊंनी खान्देशात पक्ष वाढवण्याचा शब्द दिला आहे. ते जेव्हा शब्द देतात तेव्हा तो पूर्ण करतात. त्यावरून मागे हटत नाहीत, असे गौरोद्गार एकनाथराव खडसे यांच्याबद्दल राष्ट्रवादीचे सर्वेसर्वा शरद पवार यांनी काढले.
राष्ट्रवादीचे अध्यक्ष शरद पवार यांच्या उपस्थितीत एकनाथ खडसे यांनी आज राष्ट्रवादीत प्रवेश केला. यावेळी खडसे यांच्या पत्नी मंदाकिनी खडसे आणि कन्या रोहिणी खडसे यांनीही राष्ट्रवादीत प्रवेश केला. त्यानंतर उपस्थितांना संबोधित करताना पवार बोलताना म्हणाले की, नाथाभाऊंनी राष्ट्रवादीत प्रवेश केल्याने आता संपूर्ण खान्देश राष्ट्रवादीमय होईल, यात मला शंका नाही. एकदा शब्द दिला म्हणजे त्यावरून नाथाभाऊ मागे हटत नाहीत, असे गौरोद्गार काढले. तसेच नाथाभाऊ राष्ट्रवादीत आल्याने आता पक्षाला गती येईल. नाथाभाऊंनी खान्देशात पक्ष वाढवण्याचा शब्द दिला आहे. ते जेव्हा शब्द देतात तेव्हा तो पूर्ण करतात. त्यावरून मागे हटत नाहीत. ही त्यांची खासियत आहे. आता कोरोनाच्या संकटातून बाहेर पडल्यावर आपण जळगावात जाणार असून नाथाभाऊ काय चीज आहे हे दाखवून देणार आहोत, असेही पवार म्हणाले. नाथाभाऊंनी राष्ट्रवादीत प्रवेश करण्यापूर्वी माझ्याशी चर्चा केली होती. पण काही लोकांनी खडसेंनी मंत्रिपदाची मागणी केल्याच्या बातम्या पसरवल्या आहेत. त्यात काही तथ्य नसून नाथाभाऊंनी चर्चा करताना एकाही शब्दाने पदाची अपेक्षा केली नाही, असं सांगताना जयंतराव पाटील यांच्या नेतृत्वात पक्षाचं काम चांगलं सुरू आहे. आता नाथाभाऊंच्या साथीने ते पक्ष वाढवतील. नाथाभाऊंच्या अनुभवाचा फायदा होईल, असं पवार म्हणाले.
