ज्योतिषाने सांगितले म्हणून पंतप्रधान मोदींनी संसदेची नवी इमारत ; संजय राऊत यांचा गंभीर आरोप !

मुंबई (वृत्तसंस्था) सध्याच्या संसदेत १० वर्षांपेक्षा अधिक काळ कोणाचाही सत्ता टिकलेली नाही. त्यामुळे नवी संसद बांधा असा सल्ला पंतप्रधान नरेंद्र मोदी यांना एका ज्योतिषाने दिल्याने त्यांनी २० हजार कोटींची संसदेची नवी इमारत बांधल्याचा दावा शिवसेनेचे (ठाकरे) खासदार संजय राऊत यांनी केला आहे. थोडक्यात पंतप्रधान पद टिकावं म्हणूनच ज्योतिषाच्या सल्लानुसार हे संसद भवन उभारल्याचा गौप्यस्फोटही राऊत यांनी अप्रत्यक्षपणे केला आहे.

खासदार संजय राऊत यांनी आपल्या ‘रोखठोक’ सदरात नव्या संसद इमारतीबाबत भाष्य केले आहे. याबाबत पत्रकारांनी विचारले असता राऊतांनी काही दावे केले. पत्रकारांशी बोलताना राऊत म्हणाले, नवे संसद भवन केवळ मेगा शो आहे. हे किती स्टारचे हॉटेल आहे, हे मला माहीत नाही. मी जेव्हा नव्या संसदेतून गेलो, तेव्हा मला ऐतिहासिक इमारतीतून जातोय, असे वाटलेच नाही. मी जेव्हा जुन्या संसद भवनातून जायचो, तेव्हा वाटायचे की, आपल्यासोबत इतिहास चालत आहे. मात्र नव्या संसदेत ना इतिहास आहे, ना काही वर्तमान आहे.

सध्याचे संसद भवन आणखी किमान ५० ते १०० वर्ष मजबुतीने उभे राहील, असे असतान नव्या संसद भवनाचा घाईघाईने केले हा अट्टाहास कशासाठी? याबाबत दिल्लीतील वर्तुळात ज्या चर्चा सुरु आहेत, त्या मनोरंजक आहेत. केंद्रातील सरकार हे अंधश्रद्धा आणि अंधभक्तांच्या वर्तुळात फिरत आहे. देश चालवणाऱ्यांच्या मनावर अंधश्रद्धा, ग्रह कुंडलीचा पगडा आहे. सध्याचे संसद भवन दहा वर्षांनंतर तुम्हाला धार्जिणे नाही. १० वर्षांपेक्ष जास्त काळ येथे कोणी टिकत नाही. त्यामुळे नव्या संसद भवनाची उभारणी करा, असे ज्योतिषी सल्ला मानून नव्या संसद भवनाच उभारणी २०२४ च्या आधी केली. नवी वास्तू गोमुखी असावी, असा त्या ज्योतिषाचार्याच आग्रह होता. त्यानुसार नवी वास्तू झाली, असाही दावा संजय राऊत यांनी आपल्या लेखात केला आहे.

लोकसभेसाठी इतर ‘दोन’ दरवाजे पंतप्रधान व उपराष्ट्रपतींना प्रवेश करण्यासाठी स्वतंत्र व्यवस्था. त्यामुळे अधिवेशन काळात कधीच अव्यवस्था दिसली नाही. नव्या संसद भवनात लोकसभा व राज्यसभेसाठी एकच ‘दार’. त्यामुळे सुरुवातीपासून गोंधळास सुरुवात होते. आत शिरताच एका परिचित पत्रकाराने विचारले, “नवे संसद भवन कसे वाटले?” “हिंदुस्थानच्या प्रतिष्ठेला शोभेल असे हे संसद भवन अजिबात वाटत नाही. 140 कोटी लोकसंख्या असलेल्या लोकशाही मंदिरात प्रवेश केल्यासारखे वाटत नाही,” असे माझे त्यावर उत्तर होते, असेही लेखात म्हटले आहे.