जळगाव ( प्रतिनिधी ) – शहरातील मुख्य बाजारपेठेचा परिसर असलेल्या टॉवर चौकातील उपाध्ये लॉजवर सुरू असलेल्या कुंटणखान्यावर एलसीबी व एएचटीयुच्या पथकाने छापा टाकला. या कारवाईमध्ये देहविक्री करणाऱ्या एका महिलेची सुटका केली. तर कुंटणखाना चालविणारा राजू मोतीराम जोशी (वय ४५, मूळ रा. मल्लाराता सेमारी, जि. सलुंबर, राजस्थान, ह.मु. उपाध्ये लॉज) याला अटक करण्यात आले आहे. ही कारवाई दि. ९ मे रोजी करण्यात आली आहे.
शहरातील मध्यवर्ती आणि बाजारपेठेचा परिसर असलेल्या टॉवर चौकातील उपाध्ये लॉजमध्ये कुंटणखाना सुरू असल्याची माहिती स्थानिक गुन्हे शाखेचे पोलिस निरीक्षक राहुल गायकवाड यांना मिळाली. त्यांनी स्थानिक गुन्हे शाखा व अनैतिक मानवी वाहतूक प्रतिबंधक कक्ष (एएचटीयू) यांचे पथक तयार करून डमी ग्राहक पाठविला. डमी ग्राहकाने तेथे पोहचल्यानंतर पैशाची बोलणी करून इशारा केला आणि सापळा रचून बसलेले पोलिसांचे पथक आत पोहचले.
महिलेची सुधारगृहात रवानगी
पोलिसांच्या पथकाने लॉजवर छापा टाकला त्या वेळी तेथे एक महिला ग्राहकासह सापडली. तिची सुटका करून तिला सुधारगृहात पाठविले. पथकाने रोख रक्कम, मोबाईल व साहित्य जप्त केले आहे. या प्रकरणी पोहेकॉ अर्चना भावसार यांनी शहर पोलिसात फिर्याद दिली. त्यावरून राजू जोशी याच्याविरुद्ध गुन्हा दाखल करण्यात येऊन त्याला अटक करण्यात आले. तपास सहायक निरीक्षक सुरेश आव्हाड करीत आहेत.
