नवी दिल्ली (वृत्तसंस्था) देशातील ५ राज्याच्या विधानसभा निवडणुकांच्या प्रचाराला सुरुवात झाली आहे. लखनऊमधील पार्टी कार्यालयातच कॉंग्रेस नेता कन्हैया कुमारवर शाईफेक झाल्याची घटना घडली आहे. उत्तर प्रदेशात विधानसभा निवडणुकीसाठी कॉंग्रेसचा प्रचार करण्यासाठी कन्हैया कुमार दाखल झाले होते.
काँग्रेसने जोरदार कंबर कसली आहे. काँग्रेसने या निवडणुकीत पक्षातील स्टार नेत्यांना स्टार प्रचारक म्हणून उतरवले आहे. कन्हैय्या कुमार हे सुद्धा काँग्रेसचे स्टार प्रचारक आहेत. ते काँग्रेसच्या प्रचारासाठी लखनऊमध्येही दाखल झाले आहेत. काँग्रेस कार्यालयात कार्यकर्त्यांशी संवाद साधत असताना एका व्यक्तिने कार्यालयात घुसून कन्हैय्या कुमार यांच्यावर शाईफेक केली. त्यामुळे काँग्रेस कार्यकर्ते भडकले आणि त्यांनी शाईफेक करणाऱ्याला बदड बदड बदडले. त्यामुळे काँग्रेसच्या कार्यालयात एकच गोंधळ उडाला. कन्हैय्या कुमार यांनी आज लखनऊ सेंट्रलचे उमेदवार सदफ जफर यांच्या प्रचारात भाग घेतला होता. त्यानंतर कार्यालयात आले असता त्यांच्यावर शाई फेकण्यात आली.
दरम्यान, आरोपी तरुणाला पोलिसांनी ताब्यात घेतलं असून, तर जखमींना रुग्णालयात पाठवण्यात आलं आहे. एडीसीपी सेंट्रल राघवेंद्र मिश्रा यांनी सांगितलं की, आरोपीला ताब्यात घेऊन त्यांची चौकशी करण्यात येत आहे. कन्हैया कुमार देशविरोधी बोलतो त्यामुळे हे शाईमध्ये केमिकल मिसळल्याची कबुली देवांश वाजपेयी या आरोपीने दिली आहे.
लखनऊ विधानसभेत एकूण ९ जागा आहेत. मात्र, लखनऊ सेंट्रलच्या जागेची जोरदार चर्चा सुरू असून सर्वांचं या जागेकडे लक्ष लागलं आहे. लखनऊ सेंट्रलवर भाजपचं वर्चस्व राहिलेलं आहे. या जागेवर भाजपने एक दोन नव्हे तर सातवेळा विजय मिळविलेला आहे. २०१७ च्या विधानसभा निवडणुकीत या जागेवर योगी सरकारमधील बलाढ्य मंत्री ब्रजेश पाठक मैदानात होते. त्यांनी तत्कालीन समाजवादी पार्टीचे आमदार रविदास मेहरोत्रा यांना पाच हजार मतांनी पराभूत केलं होतं. आता २०२२ च्या निवडणुकीला सुरुवात झाली आहे. येत्या २३ तारखेला या जागेवर मतदान होणार आहे. त्यामुळे या जागेच्या निकालाकडे सर्वांचं लक्ष लागलं आहे.
