पुणे (वृत्तसंस्था) ओळखीतल्या तरुणीला जेवण करण्यास कारमध्ये घेऊन जाताना तिच्यावर कारमध्ये बलात्कार (Rape in Pune) केल्याचा प्रकार समोर आला आहे. खराडी ते लोणी काळभोर यादरम्यान ही घटना घडली आहे. नराधम तरुणानं एका निर्जनस्थळी कार थांबवून पीडितेवर जबरदस्ती करत लैंगिक अत्याचार केला. याप्रकरणी पोलिसांनी बलात्कारासह अन्य कलमाअंतर्गत गुन्हा दाखल करत आरोपी तरुणाला अटक केली आहे.
पोलिसांनी दिलेल्या माहितीनुसार, ३० वर्षीय आरोपी तरुण आणि २० वर्षीय फिर्यादी तरुणी लोणी काळभारे परिसरातील रहिवासी आहेत. दोघंही एकमेकांच्या घराशेजारी राहतात. दरम्यान १३ जानेवारी रोजी आरोपी तरुणानं पीडित तरुणीला जेवणासाठी बाहेर जाऊ असं सांगितलं होतं. मला तुझ्यासोबत वेळ घालवायचा असल्याचंही त्यानं पीडित तरुणीला सांगितलं होतं. शेजारी राहणारा आणि चांगला ओळखीचा असल्याने पीडित तरुणीही त्याच्यासोबत जाण्यासाठी तयार झाली. यानंतर घटनेच्या दिवशी रात्री आठच्या सुमारास दोघंही खराडी येथील ‘पाजी दा ढाबा’ या हॉटेलात जेवण करण्यासाठी गेले. याठिकाणी जेवण केल्यानंतर दोघंही कारने परत खराडीवरून लोणी काळभोरकडे येऊ लागले.
घरी परतत असताना आरोपीनं खराडी ते लोणी काळभोर रस्त्यावरील एका निर्जनस्थळी गाडी थांबवली. याठिकाणी आरोपीनं पीडितेसोबत जबरदस्ती करत तिच्यावर बलात्कार केला. बलात्काराच्या या घटनेनंतर पीडित तरुणीनं चंदननगर पोलीस ठाण्यात आरोपी तरुणाविरोधात फिर्याद दाखल केली. पोलिसांनी विविध कलमाअंतर्गत गुन्हा दाखल करत त्याला अटक केली आहे. पोलीस सध्या आरोपीची कसून चौकशी करत असून या घटनेचा पुढील तपास सुरू आहे.
