मुंबई (वृत्तसंस्था) राज्यातील शिंदे सरकारमधील खातेवाटप जवळपास निश्चित झाल्याची माहिती सूत्रांनी दिली आहे.
सूत्रांकडून मिळालेल्या माहितीनुसार, एकनाथ शिंदे यांच्या गटाकडे नगरविकास, महाराष्ट्र राज्य रस्ते विकास महामंडळ (एमएसआरडीसी) हे खात जाणार असल्याची माहिती आहे. तसेच भाजपकडे गृह, अर्थ व महसूल खात जाणार असल्याचे समजते. यातही गृहखाते उपमुख्यमंत्री देवेंद्र फडणवीस हे आपल्याकडेच ठेवणार असल्याचे कळतेय. भाजपकडे येणारे अर्थ व महसूल खात कॅबिनेट दर्जाच्या मंत्र्यांना दिले जाणार असल्याची शक्यता आहे. तसेच भाजपच्या वाट्याला २७ तर शिंदे गटाच्या वाट्याला १४ मंत्रिपद येणार असल्याची माहिती सूत्रांकडून मिळाली आहे.
मंत्रिमंडळ वाटपाबाबत चर्चा होण्यापूर्वी मला आणि फडणवीसांना थोडा वेळ लागेल, असे सोमवारी विश्वासदर्शक ठराव जिंकल्यानंतर मुख्यमंत्री शिंदे म्हणाले होते. परंतू आता मंत्रिमंडळाच्या विस्ताराच्या हालचाली सुरू झाल्याची सूत्रांची माहिती आहे. मात्र, यावर अधिकृत शिक्कामोर्तब ११ जुलै रोजी सुप्रीम कोर्टात होणाऱ्या सुनावणीनंतर निर्णय होणार असल्याचे कळतेय.
