अमळनेर(प्रतिनिधी) माजी आमदार कृषिभूषण साहेबराव पाटील यांच्या आमदारकीच्या कार्यकाळात ८ मार्च २०१० रोजी अमळनेर येथील पोलीस अधिकारी व कर्मचारी यांचे निवासस्थान बांधकाम करण्यासाठी प्रशासकीय मान्यता देण्यात आलेली होती.
सदर निवासस्थाने बांधकाम पूर्ण झालेलं असून देखील अजून पर्यंत ती जागा अधिकारी व कर्मचारी यांना सुपूर्द करण्यात आली नव्हती, यासाठी माजी आमदार साहेबराव पाटील यांनी शासनाला व संबंधित यंत्रणेला पत्रव्यवहार करून याची आठवण व जाणीव करून दिलेली होती. तरी पाहिजे तशी दखल घेण्यात आलेली नव्हती. सदर बांधकाम पूर्ण होऊन देखील कर्मचाऱ्यांना मिळत नाही म्हणून शेवटी माजी आमदार यांनी १५ ऑगस्ट २०२० रोजी उपोषण करण्याबाबतचे पत्र प्रशासनाला पाठवले होते, शेवटी आता २ ऑक्टोबर रोजी गांधी जयंतीला माजी आमदार साहेबराव पाटील उपोषणाला बसणार होते, या उपोषणाची तातडीने दखल घेत प्रशासनाने पाऊले उचलायला सुरवात केली,व लवकरच ती निवासस्थाने आता अधिकारी व कर्मचारी यांना सुपूर्द करण्यात येणार आहेत.
या निवासस्थानांमध्ये ५ इमारती अधिकारी तर ३६ खोल्या या कर्मचारी यांच्यासाठी आहेत.या इमारतींसाठी एकूण ५५६.३९ लाख एवढ्या रकमेचे धनादेश सार्वजनिक बांधकाम विभागाकडे १५ डिसेंबर २०१६ पर्यंत पाठवण्यात आलेले होते. विद्युत व पाणीपुरवठा च्या सोयी नगरपालिकेने तत्परतेने सोडवल्यामुळे आता लवकरच या इमारतींमध्ये अधिकारी व कर्मचारी यांचा रहिवास पाहायला मिळणार आहे. माजी आमदार साहेबराव पाटील यांच्या आमदारकीच्या कार्यकाळात प्रशासकीय मान्यता मिळालेली होती तेव्हापासून तर आजपर्यंत त्यांनी सातत्याने या बाबतचा पाठपुरावा केला होता.
