लखनऊ (वृत्तसंस्था) केंद्रीय मंत्री अजय मिश्रा पुन्हा एकदा वादात अडकले आहेत. अजय मिश्रा यांना नवीन चौकशी अहवालात त्यांचा मुलगा आशिष मिश्राविरोधात अजून गुन्हे दाखल करण्याची शिफारस करण्यात आल्याबद्दल विचारण्यात आलं असता ते संतापले. यावेळी प्रश्न विचरणाऱ्या पत्रकाराला त्यांनी “हे असले प्रश्न एसआयटीला जाऊन विचारा. तुमचं डोकं फिरलं आहे का?,” अशा शब्दात सुनावलं आणि त्यांनी पत्रकारांना शिवी दिली.
लखीमपूर खीरी हिंसाचार प्रकरणावरून देशभरात संताप व्यक्त होत आहे. याप्रकरणात केंद्रीय राज्यमंत्री अजय मिश्रा यांचा मुलगा आशिष मिश्रा हा प्रमुख आरोपींपैकी एक आहे. त्याच्यावर कोर्टाच्या आदेशाने कठोर कलमे लावण्यात आली आहेत. त्यातच लखीमपूरची घटना हा पूर्वनियोजित कट होता, असा अहवाल विशेष तपास पथक अर्थात एसआयटीने दिल्याने आशिष मिश्रा याच्या अडचणी अधिकच वाढल्या आहेत. याबाबत आज प्रश्न विचारण्यात आला असता अजय मिश्रा पत्रकारांवर भडकले.
लखीमपूरमधील ओयल येथे मदर चाइल्ड केअर हॉस्पिटलच्या ऑक्सिजन प्लांटचे उद्घाटन करण्यासाठी अजय मिश्रा आले होते. यावेळी लखीमपूर खीरी प्रकरणी एसआयटीच्या अहवालावर एका पत्रकाराने प्रश्न विचारला. त्याला उत्तर देताना मिश्रा यांचा तोल सुटला. ‘हा प्रश्न त्या एसआयटीला जाऊन विचारा. डोकं फिरलंय का तुझं. तुम्ही सा… मीडियावाल्यांनी एका निर्दोष व्यक्तीला अडकवलं आहे. तुम्हाला लाज वाटली पाहिजे. किती वाईट वागताय तुम्ही. तुम्हाला काय माहीत आहे’, असे म्हणत अजय मिश्रा या पत्रकाराच्या अंगावर धावून गेले. या घटनेचा व्हिडिओही समोर आला आहे. त्यात अजय मिश्रा यांनी पत्रकारावर हात उचलला असता इतरांनी त्यांना रोखल्याचे दिसत आहे.
