जळगाव (प्रतिनिधी) – घराचे बांधकाम सुरु असल्याने कुटुंबिय घराबाहेर अंगणात झोपलेले असतांना, चोरटे घरात शिरुन त्यांनी सोने-चांदीच्या दागिन्यांसह रोख रक्कम असा एकूण ७० हजार रुपयांचा ऐवज चोरुन नेला. ही घटना शहरातील बॉम्बे बेकरीच्या मागील बाजूस असलेल्या मलिक नगरात घडली. याप्रकरणी अज्ञात चोरट्यांविरुद्ध गुन्हा दाखल करण्यात आला आहे.
शहरातील मलिक नगरात शेख रुस्तम शेख निजाम (वय ६६) हे वास्तव्यास असून ते गॅरेजकाम करून आपला उदरनिर्वाह चालवतात. दि. २५ जुलै रोजी रात्री ११:३० वाजेपासून ते २६ जुलै २०२६ रोजी पहाटे ४:३० वाजेच्या दरम्यानच्या ही चोरी झाली. घराचे बांधकाम सुरु असल्याने शेख रुस्तम शेख निजाम हे घराबाहेरी अंगणात झोपले होते, त्यावेळेस त्यांचे कुंटूबिय देखील बाहेरच झोपले होते. या वेळी घरात अज्ञातांनी प्रवेश करून घरातून तीन मोबाईल व काही सोन्याचे दागिणे असा एकूण ७० हजार रुपये किंमतीचा मुद्देमाल चोरट्यांनी चोरून नेला. २७ जुलै रोजी शेख रुस्तम शेख निजाम हे सकाळी उठल्यानंतर घरातील सामान अत्यावस्त पडलेले दिसून आले. त्यानंतर त्यांनी घरी येऊन पडताळणी केल्यानंतर एमआयडीसी पोलीस ठाण्यात जाऊन सायंकाळी ५.३० वाजता त्यांच्या फिर्यादीवरुन अज्ञात चोरट्यांविरुद्ध गुन्हा दाखल करण्यात आला आहे.
तांत्रीक विश्लेषणाद्वारे दोघ चोरटे जेरबंद
गुन्हा दाखल झाल्यानंतर हा गुन्हा उघडकीस आणण्याच्या सूचना उपविभागीय नितीन गणापुरे यांनी पोलीस निरीक्षक बबन आव्हाड यांना दिल्या. त्यानुसार पोहेकॉ रामकृष्ण पाटील, ललित नारखेडे, शशिकांत मराठे, रमाकांत साळुंखे, मोतीलाल बोरसे यांचे पथक तयार केले. या पथकाने तांत्रिक विश्लेषणाच्या आधारावर संशयित आदील खान सादीक खान (वय ३०, रा. मास्टर कॉलनी), अरजान उर्फ दालचावल खान अक्रम खान (वय वय ३०, रा. मास्टर कॉलनी) यांना ताब्यात घेतले. त्यांची कसून चौकशी केल्यानंतर त्यांनी चोरलेला मुद्देमाल काढून दिला.
