मुंबई (वृत्तसंस्था) टूथपेस्ट समजून उंदीर मारण्याच्या औषधाने दात घासल्याने मुलीचा मृत्यू झाला आहे. धरावी परिसरात ही धक्कादायक घटना घडली. झोपेतून उठल्यानंतर या मुलीने उंदीर मारण्याच्या विषाने दात घासले. नजरचुकीने तिने टूथपेस्ट समजून विष ब्रशवर घेतलं आणि थेट दात घासण्यास सुरुवात केली. मात्र चव वेगळी लागल्यानंतर हा प्रकार समोर आला.
पोलिसांकडून मिळालेल्या माहितीनुसार, अफसाना खान (वय १८) असे या मयत मुलीचे नाव आहे. अफसाना खान सकाळी उठली आणि दात घासायला बाथरुममध्ये गेली. जिथे टूथपेस्टच्या बाजूला उंदीर मारण्याची विषारी पेस्ट ठेवली गेली होती. नकळत तिनं ब्रशला उंदीर मारायची पेस्ट लावली आणि ब्रश करू लागली, वास आणि चवीमुळे आपण उंदीर मारायची पेस्ट लावल्याचं जाणवलं तेव्हा तिनं लगेच तोंड धुतलं. मात्र तोंड धुतानाच अफसानाला अचानक चक्कर येऊ लागली आणि तिची तब्येत ढासाळू लागली. घडलेला सर्व प्रकार तिनं तिच्या घरच्यांना सांगितला. घरच्यांनी क्षणाचाही विलंब न करता अफसानाला जेजे रुग्णालयात उपचारासाठी दाखल केलं. जेजे रुग्णालयात अफसानावर उपचार सुरु होते, मात्र उंदीर मारण्याच्या पेस्टमधील विष संपूर्ण शरीरात पसरलं होतं आणि रविवारी संध्याकाळी अफसानाची दुर्दैवी मृत्यू झाला.
तिच्या कुटुंबात आई, वीस वर्षीय बहीण आणि दोन लहान भाऊ असा परिवार होता. आई फळं विकून आपलं घर चालवत होती. बहीणही घरीच असायची. पोलिसांनी या प्रकरणात एडीआर दाखल करून तिच्या आईचा जबाब नोंदवला आहे. तिच्या आईनं घडलेला सर्व प्रकार पोलिसांना सांगितला असून आपल्याला या प्रकरणात कोणावरही संशय नसल्याचा जबाब पोलिसांना दिला आहे.
