वरणगाव (प्रतिनिधी) वरणगाव फॅक्टरी आवारातील सुशील नगर सर्कलनजीक मित्रांमध्ये किरकोळ वादातील कुरापतीचा वाद वाढल्याने डोक्यात काठी मारताच मित्राचा मृत्यू झाला. ही धक्कादायक घटना रविवारी सकाळी 10.30 वाजेच्या सुमारास घडली. या घटनेत प्रमोद ज्ञानेश्वर महाजन (58, शिवाजीनगर, वरणगाव) यांचा मृत्यू झाला. खून प्रकरणी संशयित आरोपी दीपक सिंग (50, वरणगाव ऑर्डनन्स फॅक्टरी) यास वरणगाव पोलिसांनी ताब्यात घेतले आहे.
मुक्ताईनगरातील 81 गाव पाणीपुरवठा विभागात कर्मचारी असलेले प्रमोद महाजन हे एका मित्रासोबत वरणगाव फॅक्टरीतील सुशील नगर सर्कलवर आल्यानंतर त्यांची संशयित आरोपी तथा मित्र असलेल्या दीपक सिंग सोबत भेट झाली. यावेळी गप्पांमध्ये जुना वाद उकरून निघाल्यानंतर दोघांमध्ये बाचाबाची झाली व काहींनी मध्यस्थी केल्यानंतर वाद मिटला. याप्रसंगी प्रमोदचे काका मनोहर महाजन, माजी सरपंच नितीन सोनवणे संदीप चौधरी, सुधाकर चौधरी, हिवरे यांनी सोडवासोडव केली. मात्र पुन्हा कुरापत निघाल्यानंतर संशयित दीपक सिंगने काठीचा फटका प्रमोद महाजन यांच्या डोक्यावर मारताच घाव वर्मी लागताच त्यांचा मृत्यू झाला. उपस्थित असलेल्या व्यक्तींनी त्यास फॅक्टरी दवाखान्यात नेले असता तेथील डॉ . राजरत्न तायडे यांनी प्रमोद महाजन यांना मृत घोषित केले.
प्रमोद महाजन हे मूळ टाकळी तालुका भुसावळ येथील रहीवासी असून सध्या वरणगाव येथील शिवाजीनगर भागात राहत होता. तो जिल्हा परिषदेचे ८१ गावांच्या पाणीपुरवठा योजनेमध्ये कर्मचारी म्हणून काम करीत होता. या घटनेत संशयित आरोपी दीपक कृष्णकुमार सिंग राहणार वरणगाव फॅक्टरी यास अटक करण्यात आली आहे. पोलिसांनी त्वरित घटनास्थळी जाऊन घटनास्थळाचा पंचनामा केला आहे. मयताचा मृतदेह त्यानंतर वरणगाव ग्रामीण रुग्णालयाचा शव विच्छेदनासाठी आणण्यात आलेला आहे.
वरणगाव पोलीस स्टेशनचे सपोनि आशिष कुमार अडसूळ व पी एस आय परशुराम दळवी व पोलीस स्टाफ त्वरित घटनास्थळी धाव घेऊन आरोपीचा शोध घेवुन त्यास अटक केली. घटनास्थळी मुक्ताईनगर उपविभागीय पोलिस अधिकारी राजकुमार शिंदे यांनी भेट दिली. याप्रकरणी वरणगाव पोलीस ठाण्यात मयताचे चुलत काका मनोहर ओंकार महाजन (रा. टहाकळी) यांच्या फिर्यादी वरून गुन्हा दाखल करण्यात आला आहे. मयत महाजन यांच्या पश्चात आई वडील, पत्नी, एक मुलगा व एक मुलगी असा परिवार आहे. मयत प्रमोद यांचे वडील पूर्वी वरणगांव फॅक्टरीत नोकरीला असल्याने दिपक सिंग व महाजन गेल्या ३० वर्षा पासुन मित्र असल्याचे समजते.
