बीड (वृत्तसंस्था) खोदकाम सुरू असलेल्या ठिकाणी पोकलेन बाजूला उभा करून त्याच्या शेजारीच असलेल्या मोकळ्या जागेत झोपलेल्या दोन पोकलेन ऑपरेटरला टिप्परने चिरडल्याची दुर्देवी घटना रविवारी (दि.१९) पहाटे पाली परिसरात (ता. बीड) उघडकीस आली. या घटनेत दोन्ही ऑपरेटरचा जागीच मृत्यू झाला आहे. बीड ग्रामीण पोलीस ठाण्यात याप्रकरणी गुन्हा दाखल करण्यात आला असून टिप्पर ठाण्यामध्ये लावण्यात आले आहे.
बीड तालुक्यातील पाली परिसरात एका ठिकाणी पोकलेन, जेसीबीच्या सहाय्याने उत्खनन सुरू होते. मुरूम भरण्यासाठी त्याठिकाणी टिप टिप्पर देखील आलेले होते. शनिवारी रात्री खोदकाम झाल्यानंतर पोकलेनचे ऑपरेटर सुभाष कुमार चव्हाण (वय ३५ रा. बिहार) आणि समाधान बाळू थोरात (वय २३ रा. सावरगाव ता. बीड) हे दोघे जवळच असलेल्या मोकळ्या मैदानात झोपले होते. मध्यरात्री त्याठिकाणी मुरूम भरण्यासाठी आलेले टिप्पर (एमएच.२३ ए.यू.२००३) हा रिव्हर्स घेत असतांना त्याने पाठीमागे पाहिलेच नाही. त्यामुळे टायरखाली आल्याने झोपेत असलेले सुभाष कुमार चव्हाण आणि समाधान थोरात यांचा जागीच मृत्यू झाला.
मध्यरात्री हा प्रकार कोणाच्याच लक्षात आला नाही. रविवारी पहाटे ही दुर्दैवी घटना उघडकीस आली. सदरील टिप्पर ग्रामीण पोलिसांनी ताब्यात घेतला असून ते खोदकाम कोठे सुरू होते?, चालक कोण होता? याचा पोलीस तपास करत आहेत. घटनेची माहिती कळताच नातेवाईकांनी जिल्हा रुग्णालयात गर्दी करत एकच आक्रोश केला. याप्रकरणी गुन्हा दाखल करण्यात आला असून, तपास पोलीस करीत आहेत.
