सातपूर (वृत्तसंस्था) प्रियकराने प्रेमात दिलेले वचन न पाळता दगा दिल्याने आपल्या जगण्याचा आधारच सुसाइड नोटमध्ये लिहून एका विवाहित महिलेने मंगळवारी (दि. ९) दुपारी आत्महत्येचा प्रयत्न केल्याची घटना सातपूर परिसरात घडली. विशेष म्हणजे, महिलेने सातपूर पोलीस ठाण्यासमोरच आत्महत्या करण्याच्या उद्देशाने हे पाऊल उचलल्याने परिसरात खळबळ उडाली आहे.
याबाबत मिळालेल्या माहितीनुसार, जळगाव जिल्ह्यातील विवाहितेला तिच्या पतीने आठ वर्षांपूर्वी विभक्त केले आहे. तिला ११ वर्षांचा मुलगा असून, तो जळगाव जिल्ह्यात पतीकडेच आहे. आठ वर्षांपासून ती हरविल्याचे नाशिकला गंगापूर हद्दीत आपल्या आई-वडिलांकडे राहते. औद्योगिक वसाहतीतील एका कारखान्यात ती काम करीत असून, तेथेच काम करणाऱ्या युवकासोबत तिचे प्रेमसंबध जुळले. दोघांनी लग्न करण्याचा निर्णय घेतला होता.
विवाहितेने एखादे घर ताबेगहाण करण्यासाठी युवकाकडे एक लाख रुपयांची रक्कमही दिली. ही बाब तिच्या आई-वडिलांना कळल्याने आठ दिवसांपूर्वी तिला आई-वडिलांनी घरातून काढून दिले. त्यामुळे ती थेट प्रियकराच्या घरी गेली. प्रियकराच्या घरी ते आठ दिवसांपासून राहत होती. मात्र, त्याच्या आईनेही त्यांच्या संबंधाला विरोध करीत तुम्हाला लग्न करायचे असेल, तर वेगळी खोली घेऊन राहा, असे म्हणून तिला घराबाहेर काढले. अशा कठीण परिस्थितीत प्रियकरानेही साथ सोडल्याने प्राण त्यागत असल्याचे महिलेने सुसाइड नोटमध्ये लिहून हाताची नस कापून घेतली
प्रेमप्रकरणातून महिलेने थेट पोलीस ठाण्यातच आत्महत्येचा प्रयत्न केल्याने पोलिसांची धावपळ उडाली. त्यामुळे पोलिसांनीही हे प्रकरण गांभीर्याने घेत तत्काळ तिच्या प्रियकरास सातपूर पोलीस ठाण्यात बोलावून घेत त्याचे समुपदेशन केले. प्रियकरानेही प्रेयसीसोबत पुन्हा जुळवून घेण्याची तयारी दाखवली असून, दोघांनीही नव्याने संसार थाटण्याचा निर्णय घेतला असल्याचे कळतेय. दरम्यान, संबधित महिलेला तत्काळ खासगी रुग्णालयात दाखल करण्यात आल्याने तिची प्रकृती स्थिर असून, उपचार सुरू आहे.
