जळगाव (प्रतिनिधी) आयशर वाहनावर मागून दुचाकी धडकल्याने कुसूंब्यातील युवकाचा जागीच मृत्यू झाल्याची घटना आज सकाळी साडेसात वाजेच्या सुमारास पाळधी गावाजवळ घडली. संदीप गोरख देसले (35, कुसुंबा, ता.जळगाव) असे मृत युवकाचे नाव आहे.
या संदर्भात अधिक असे की, संदीप देसले हा लक्झरीवर चालक होता. तर जळगाव तालुक्यातील कुसुंबा येथे पत्नी व दोन मुलांसह वास्तव्याला होता. आज नेहमीप्रमाणे त्याने सुरत ते कासोदा येथून लक्झरीची ट्रिप आणून प्रवाशांना सुखरूप सोडले. परंतू थोड्याच वेळाने कासोदा येथून जळगावकडे घरी जाण्यासाठी दुचाकीने घरी जातांना भयंकर घटना घडली.
पाळधी गावाजवळ राष्ट्रीय महामार्गावर वाहतूक पोलिसांनी धरणगावकडून जळगावकडे येणारी आयशरला हात दिल्यानंतर आयशर थांबतच संदीप देसलेने मागून आयशरला धडक दिली. या अपघातात संदीपच्या डोक्याला गंभीर दुखापत झाल्याने त्यांचा जागीच मृत्यू झाला. या घटनेबाबत जिल्हापेठ पोलीस ठाण्यात अकस्मात मृत्यूची नोंद करण्यात आली. मयताच्या पश्चात आई अरुणाबाई, वडील गोरख देसले, भाऊ दीपक, पत्नी सोनाली आणि ज्ञानेश्वरी व दर्पण हे दोन मुले असा परीवार आहे.
