जळगाव (प्रतिनिधी) एरंडोल तालुक्यातील खडके खुर्द येथील एका तरुणास आज न्यायालयाने सदोष मनुष्यवधाच्या गुन्ह्यात सहा वर्ष कैद व एक हजार रुपये दंडाची शिक्षा सुनावली आहे.
छायाबाई किशोर महानुभाव, पती किशोर शेनफडू महानुभाव, मुलगी पूजा व सरला उर्फ गुड्डी तुकाराम धनगर असे चौघे जण १५ मे २०१६ रोजी बैलगाडीने शेतात जात असताना सरलाचा भाऊ समाधान, आई सुबाबाई व वडिल तुकाराम त्र्यंबक धनगर असे या चौघांजवळ आले व सरलाला तुम्ही कामाला घेऊन जातात असा जाब विचारुन शिवीगाळ करुन समाधान याने हातातील काठीने छायाबाई हिच्या डोक्यावर मारली. तसेच सरलाला कामावर नेले तर तुम्हाला जीवंत ठेवणार नाही, अशी धमकी दिली होती. छायाबाई यांनी उपचार घेत असताना पोलिसांना असा जबाब दिला होता त्यावरुन एरंडोल पोलिसात तिघांविरुध्द गुन्हा दाखल झाला होता. यानंतर १८ मे रोजी छायाबाई यांचा जिल्हा रुग्णालयात मृत्यू झाला होता.
तपासाधिकारी एम.एस.बैसाणे यांनी तपास पूर्ण करुन न्यायालयात दोषारोपपत्र पाठविले. तर प्रमुख जिल्हा व सत्र न्यायाधीश मोहन देशपांडे यांच्या न्यायालयात हा खटला चालला. मयताची मुलगी पुजा, डॉ.शेख आसिफ इकबाल, डॉ.प्राजक्ता भिरुड, डॉ.मुकेश चौधरी, मृत्यूपुर्व जबाब घेणारे सहायक फौजदार भालचंद्र पाटील आदींसह १४ जणांच्या साक्षी घेण्यात आल्या. सरकारपक्षाचा पुरावा व सरकारी वकील प्रदीप महाजन यांनी केलेला युक्तीवाद ग्राह्य धरुन न्यायालयाने समाधान धनगर याला ३०४ (२) सदोष मनुष्यवधाच्या गुन्ह्यात दोषी धरुन सहा वर्ष कैद व एक हजार रुपये दंडाची शिक्षा सुनावली. तर गुन्ह्यातील दुसरा आरोपी तुकाराम धनगर खटला सुरु असताना त्याचा मृत्यू झाला असून सुबाबाई हिची निर्दोष मुक्तता करण्यात आली. विशेष म्हणजे मयताचे पती व सरला हे दोघं जण फितूर झाले होते.
